above post ad local

ആശങ്കയുടെ ഒരു മണിക്കൂർ; താലിബാന്റെ കണ്ണിൽപ്പെടാതെ അഫ്ഗാന്റെ ആകാശത്ത് വട്ടമിട്ട് ഇന്ത്യൻ വിമാനം

ന്യൂഡൽഹി: ഞായറാഴ്ച ഉച്ചയ്ക്ക് 12.43നു തന്നെ ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ നിന്ന് എയർ ഇന്ത്യയുടെ എയർബസ് എ 320 വിമാനം പറന്നു പൊങ്ങി. ലക്ഷ്യം താലിബാൻ പിടിച്ചടക്കിയ, കലാപ കലുഷിതമായ അഫ്ഗാനിസ്ഥാൻ. ഭീകരരുടെ കൈകളിലകപ്പെടാതെ അഫ്ഗാനിസ്ഥാനിൽ കുടുങ്ങിയ സ്വന്തം പൗരന്മാരെ സുരക്ഷിതരായി തിരിച്ചെത്തിക്കാൻ ഇന്ത്യ അയച്ച വിമാനമാണത്.

കൃത്യ സമയത്തുതന്നെ വിമാനം അഫ്ഗാന്റെ ആകാശം തൊട്ടെങ്കിലും ഇറങ്ങാൻ അനുമതി ലഭിച്ചില്ല. കാരണം അപ്പോഴേക്കും അഫ്ഗാനിസ്ഥാനിൽ സ്ഥിതിഗതികൾ മാറി മറിഞ്ഞിരുന്നു. തലസ്ഥാനമായ കാബൂളും പിടിച്ചടക്കി താലിബാൻ അഫ്ഗാനിസ്ഥാന്റെ പൂർണ നിയന്ത്രണം ഏറ്റെടുത്തതോടെ കാബൂൾ എയർ ട്രാഫിക് കൺട്രോൾ റൂമിന് എയർ ഇന്ത്യ വിമാനത്തിന് വിവരങ്ങൾ കൈമാറാൻ കഴിഞ്ഞില്ല. ഉടനെ പൈലറ്റ് വിമാനത്തിന്റെ റഡാർ ഓഫ് ചെയ്തു. ഒടുവിൽ താലിബാന്റെ നിരീക്ഷണത്തിൽ അകപ്പെടാതെ ഒരു മണിക്കൂറോളം വിമാനം അഫ്ഗാന്റെ ആകാശത്ത് വട്ടമിട്ടു. ആശങ്കയുടെ നിമിഷങ്ങൾക്കൊടുവിൽ കാബൂൾ സമയം ഉച്ചയ്ക്ക് 1.45ന് സുരക്ഷിതമായി വിമാനം ഇറങ്ങി.

നാൽപ്പതു യാത്രക്കാരുമായി കാബൂളിലെത്തിയ വിമാനം നയതന്ത്ര പ്രതിനിധികളും സുരക്ഷാ ജീവനക്കാരുമടക്കം 162 ഇന്ത്യക്കാരുമായി അവിടെനിന്ന് പറന്നുയർന്നിട്ടുണ്ട്. ഇന്ന് രാത്രിയോടെ ഡൽഹിയിൽ മടങ്ങിയെത്തും. കാണ്ഡഹാറിലെയും മസർ ഇ-ഷെരിഫിലെയും ഇന്ത്യൻ കോൺസുലേറ്റുകൾ അടച്ചു. ഇതോടെയാണ് കാബൂളിൽ കുടുങ്ങിയ മുഴുവൻ ഇന്ത്യക്കാരെയും പ്രത്യേക വിമാനങ്ങളിൽ ഇന്ത്യ തിരിച്ചുകൊണ്ടുവരുന്നത്.

- Advertisement -

- Advertisement -

- Advertisement -

Comments are closed.